Ligji i Sponsorizimit ka qenë gjithmonë një çështje për të cilën është folur në vitet e fundit dhe diskutimet ende vazhdojnë.
Një ligj, i cili nuk është se i ka dhënë shumë frymëmarrje çdo shoqate sportive dhe grupimi, për të rritur aftësitë menaxhuese dhe për t’u formalizuar. Në konferencën kombëtare të mbajtur nga Ministria e Arsimit dhe Sportit, e ftuar në panel ishte edhe Daulina Osmani, zv.ministrja e Kulturës, Rinisë dhe Sporteve në Kosovë dhe ndau më shumë rreth funksionit të Ligjit të Sponsorizimit në Kosovë.
“Buxheti për federatat sportive në Kosovë nga vitit 2018 është rritur në masën 200%. Ligji i Sponsorizimit u jep mundësinë bizneseve që të lirohen deri në masën 30 për qind të tatimit në fitim me kusht që këtë vlerë ta investojnë në sport.
Fillimisht kishte shumë skepticizëm edhe nga ekspertë të financave në vitin 2017 dhe nga institucione publike. Nga ana tjetër, është pritur mirë nga komuniteti sportiv dhe është një ndër kanalet kryesore të financimit të sportit në Kosovë. Në vitin 2021 totali i mbështetjes nga ky ligj ishte 8.3 milionë euro dhe 85 për qind, mbi 7 milionë euro kanë qenë për sportin, ndërsa pjesa tjetër për kulturën dhe rininë, me 513 kontrata të nënshkruara mes bizneseve dhe sportit. Në 2022- shin është rritur në 10.5 milionë euro, dhe ka shkuar direkt në sport.
Nëse e shohim ndarjen për nga lloji i organizatës sportive, 13% ka shkuar te federatat sportive, 2% te Komiteti Olimpik dhe 85% te klubet sportive. Ju në Shqipëri e keni që edhe bashkitë financojnë sportin, ndërsa në Kosovë është e kundërta, sepse kjo është e centralizuar te pushteti qendror. Ndërsa në llojin e sportit, futbolli merr 3.5 milionë euro nga totali, basketbolli 3 milionë euro dhe volejbolli në 500 mijë euro.
LIGJI I SPONSORIZIMIT
KOSOVË/TATIMI 30%
VITI 2022
SPORTI 9.2 MLN EURO
PËRFITOJNË
KLUBET SPORTIVE 85 %
FEDERATAT SPORTIVE 13%
KOMITETI OLIMPIK 2 %
NDARJA
FUTBOLLI 3.5 MLN
BASKETBOLLI 3 MLN
VOLEJBOLLI 0.5 MLN
SPORTET E TJERA 0.8
