Tani është “luftë” e hapur. Shqipëria dhe Kosova janë në llogore të ndryshme dhe gara ka nisur.
Sinjalin e dha Fadil Vokrri, i cili uroi presidentin e FSHF-së, Armand Dukën, në anglisht për rizgjedhjen si president i qeverisë shqiptare të futbollit, thua se në Kosovë shqipja nuk është gjuhë zyrtare, sikurse edhe në vendin e tyre mëmë.
Në media mund të hiqen si të dashur me njëri-tjetrin dhe në shkresa mund të ofrojnë bashkëpunim, por brenda në vetvete e shohin si derbi dhe gjithsecili do të tregojë se kush është më i miri.
Shqipëria e Kosova duket se po kthehen si dy lagje të një qyteti dhe nëse vazhdohet me këtë frymë nuk do të jetë e largët dita që do të kemi ndonjë shfaqje të shëmtuar edhe në stadium nëse do të ketë përballje në fushë mes kombëtares kuqezi dhe përfaqësueses së Kosovës.
Sekretari i FFK-së, Eroll Salihu, në një prononcim të dhënë për “Koha Ditore” ka paralajmëruar se do mbrojnë lojtarët e tyre në FIFA në të ardhmen dhe për këtë kanë nisur bisedimet.
“Rregullat për statusin e lojtarit nga FIFA janë të qarta.
Nuk mund të marrin nënshtetësi dhe të bëhen pjesë e Shqipërisë pa pasur edhe një person nga Shqipëria ose pa jetuar të paktën dy vjet në Shqipëri.
Kem nisur diskutimet me FIFA-n për mbrojtjen e lojtarëve të Kosovës. Nëse kemi ndonjë rast do të reagojmë në FIFA”, thotë Sallihu. /EDS/
