Alesandro Kostakurta, ish-futbollist tashmë në rolin e analistit për “Sky Sport”, ka komentuar momentin e vështirë që Milani po kalon pas humbjes me Atalantën. 53-vjeçari ka dyshime mbi cilësinë e organikës nën urdhrat e Piolit, ndaj në deklaratën e tij ka theksuar:
“Nuk duhet të jemi drastikë me përfundimet sepse fundja një ndeshje e dobët i ndodh kujtdo, e aq më tepër kundër një skuadre si Atalanta që ndërton 20 raste për gol çdo ndeshje. Megjithatë, në atë humbje ka shumë sinjale mbi vështirësitë e Milanit”.
Kostakurta nuk beson se vlera e lojtarëve kuqezinj është ajo që propagandohet nga drejtuesit e klubit apo edhe vetë trajneri Pioli, i cili i njeh vështirësitë në lidhje me situatën e nxehtë që ka pranuar të marrë pas shkarkimit të Xhampaolos.
“Vlera objektive e skuadrës është një tjetër diskutim. Milani edhe kur ka bërë detyrën ndaj rivaleve që ka mundur, nuk është se ka bindur me lojën e ofruar.
Pioli e ka punën të rëndë, aq më tepër që organika kuqezi më duket shumë e limituar në cilësi”, përfundoi Alesandro Kostakurta analizën e tij për “SKY”.
