Ka qenë Uliks Kotrri që ua ka propozuar drejtuesve të Vllaznisë trajnerin aktual Thomas Brdariç dhe deri në këto momente të gjitha palët janë të kënaqura me këtë bashkëpunim të nisur.
Ish- futbollisti i kuqebluve duke folur në lidhje me figurën e Brdariç e ka vlerësuar maksimalisht atë dhe po ashtu, ka thënë se është nder që një figurë e tillë ka ardhur për të punuar në Shqipëri.
“Thomas Brdariç është një emër shumë i madh i futbollit gjerman. Kuptohet që me kombëtaren nuk ka qenë ndër ato që ka lënë gjurmë të mëdha, por në Bundesligë ka qenë ndër sulmuesit më të mirë të atyre viteve kur ka luajtur ai.
Ka një moshë të re, ka shumë ambicje dhe mentalitet shumë të mirë, sidomos për këtë moment në të cilin ndodhet Vllaznia. Koha do ta vërtetojë, por them se është njeriu i duhur për të drejtuar këtë skuadër.
Kemi të bëjmë me një njeri tepër pozitiv, kërkon që çdo lojtari t’i marrë maksimumin, e mbledh ekipin në mënyrë maksimale. Pra, bën atë që ka nevojë aktualisht Vllaznia.
Brdariç vërtetë nuk ka drejtuar ekipe të mëdha më përpara, por duhet të dini se një trajner i Bundesligës së parë nuk vjen kurrë në Shqipëri për të punuar. Ai ka patur një eksperiencë me ekipet e moshave të Bajer Leverkusen, e më pas në ligat e treta gjermane, por niveli i tij është shumë më shumë se i mjaftueshëm për të drejtuar në Shqipëri.
Ka punuar edhe në Bjellorusi, Uzbekistan e po ashtu ka drejtuar për disa muaj edhe Shkëndinë e Tetovës. Ndoshta deri më tani nuk i është dhënë mundësia për të drejtuar ekipe të mira në Gjermani por them se në të ardhmen do të kapë majën edhe si trajner.
Brdariç është shumë pozitiv edhe në mënyrën e punës. Ndonëse mesa di unë, ai vetëm një ose asnjë lojtar nuk ka sjellë te Vllaznia, sërish nuk justifikohet. Thotë ky është ekipi im dhe me moton “unë i pari, të tjetër pas”, do të tentojë suksesin”- thotë Uliksi.
Kotrri në fakt ka punuar edhe me gjermanin e parë që pat ardhur te Vllaznia, Ulrih Schulze. I pyetur nëse Brdariç ka ndonjë të përbashkët me këtë trajner, ai përgjigjet:
“Jo, nuk kanë asnjë të përbashkët. Brdariç është një trajner më modern, është një figurë shumë më e madhe nga çdo aspekt. Edhe Schulze kishte shumë njohuri për futbollin, por Thomas është një cilësi më e lartë”./SHKODRA-SPORT.COM/
