“Abissnet Superiore” ka mbyllur javën e pestë, me surprizat që nuk kanë munguar në renditje. Gjithsesi disa gjëra kanë ndryshuar nga viti i kaluar, ku pas javës së pestë kampionati shihte në krye Partizanin me 12 pikë. Këtë vit, “demat” kanë grumbulluar katër pikë më pak, por janë një ndeshje mangët pasi sfida e parë me Teutën u shty për shkak të angazhimet që të kuqtë kishin në Europë.
Tirana ka bërë më mirë se sezonin e shkuar, me bardheblutë që kanë mbledhur dy pikë më shumë dhe e shohin veten në vendin e dytë, tre vende më sipër se vjet.
Progres të shkëlqyer ka bërë Egnatia, që ka grumbulluar tre pikë më shumë se sezonin e kaluar dhe se tashmë e gjen veten në vendin e parë.
Vllaznia nuk ka ndryshuar pozicion, duke qëndruar në vendin e tretë, por me një pikë më pak këtë sezon. Vitin e kaluar kishte grumbulluar 9 pikë në 5 javë kampionat, me 3 fitore dhe 2 humbje, ndërkohë që sivjet ka 8 pikë, me 2 fitore, 2 barazime dhe 1 humbje. Golaverazhi i sivjetëm 8-5, është më i mirë se ai i vjetshmi, 5-6.
Erzeni ishte gjithashtu një surprizë e bukur sezonin e shkuar, i cili pas javës së pestë e shihte veten në vendin e dytë me 11 pikë, ndërsa këtë sezon ka grumbulluar vetëm 8 pikë dhe ndodhet në vendin e pestë.
Laçi ka grumbulluar katër pikë më shumë se vjet, duke u renditur në vendin e gjashtë, dy vende më shumë se sezonin e kaluar.
Teuta ndodhet në vendin e tetë me katër pikë, por me një ndeshje më pak. Durrsakët janë një pikë dhe një pozicion më shumë se vitin e shkuar.
Sa i përket Kukësit, verilindorët janë sërish të fundit, vetëm se me një pikë më shumë se vjet.
Skënderbeu dhe Dinamo nuk janë njësoj si dy skuadrat që u ngjitën vitin e shkuar, me korçarët që kanë grumbulluar 6 pikë dhe ndodhen në vendin e shtatë, ndërsa “nëndetësja” që ka grumbulluar vetëm tre pikë dhe ndodhet në vendin e parafundit.
