Prej muajit janar, në kampionatin maltez të futbollit luan edhe një futbollist me origjinë nga Shkodra. Bëhet fjalë për sulmuesin 22 vjeçar Kristian Keqi i cili ndonëse ka vetëm kaq kohë që luan në këtë kampionat, ka filluar të lërë gjurmë duke shënuar edhe golat e parë për ekipin e tij, atë të Florianës.
I datëlindjes 28 korrik 1996, Kristian Keqi është me origjinë nga Shkodra por ka lindur dhe është rritur në Itali. Vend ku ka nisur edhe sportin duke kaluar në disa ekipe ndërkohë që me të rinjtë ka qenë pjesë e ekipit Pescara.
Më pas ka kaluar tek Potenza, Monterosi e Sangiovannese, para se kartonin e ti së fundi ta merret ekipi Arrezo që militon në Serinë C. Mosgjetja e shumë hapësirave me këtë ekip, kanë bërë që vetë drejtuesit e tij por lojtari të bien dakord për ta huazuar dikur tjetër.
Dhe në muajin janar ka kaluar nga ekipi Arrezo i Seria C italiane tek Florianca FC në Maltë, ku do të vazhdojë të luajë deri në qershor, para se të kthehet sërish në Itali. Ka luajtur deri tani gjashtë ndeshje, të gjitha si titullar dhe ka arritur të shënojë tre gola. Të parin e ka shënuar ndaj ekipit Sengles duke i dhënë fitoren 1-0 Florianës e të dytin ndaj La Valletta më 31 mars, pikërisht në minutën e 90-të duke kompletuar fitoren 2-0 të skuadrës së tij. Videon e këtij goli keni mundësinë ta ndiqni këtu më poshtë:
Ndërkohë golin e tretë e ka shënuar ndaj ekipit Mosta. Padyshim që një nisje e tillë është shumë e mirë dhe me siguri që edhe në ndeshjet e ardhshme do të vazhdojë të vazhdojë të shënojë gola të tjerë.
Floriana aktualisht ndodhet në vendin e tetë në Premier Leaguen malteze të futbollit dhe Keqi do ta shfrytëzojë këtë periudhë gjashtëmujore në këtë kampionat për të kapur formën e duhur, për të marrë më shumë minuta dhe shënuar më shumë gola, në mënyrë që kur të kthehet sërish në futbollin italian, të bëjë mirë ashtu siç dhe ai ka dëshirë.
Gjergj KOLA
