Presidentja e klubit Vllaznia, njëkohësisht edhe kryebashkiakja e qytetit të Shkodrës, zj.Voltana Ademi, pritet të jetë sot e pranishme në tribunën e stadiumit “Loni Papuçiu” të Fierit për të mbështetur kuqeblutë në ndeshjen ndaj Lushnjës. Fakti që është starti i kampionatit, e ka bërë atë të mendojë se duhet të jetë pranë skuadrës.
Një premtim të tillë e ka bërë paraditen e djeshme në takimin që ka patur me futbollistët dhe stafin teknik teksa u ka thënë atyre se do të takohen sërish në Fier. Prania e saj në stadium natyrisht që është diçka shumë pozitive sepse në fund të fundit, afron mbështetjen maksimale të institucionit që drejton dhe financon aktualisht Klubin e Futbollit Vllaznia. Edhe në takimin që ka patur dje ajo ka ofruar mbështetje maksimale për skuadrën si nga ana financiare ashtu edhe ajo morale por ka kërkuar përgjegjësi maksimale nga secili prej futbollistëve për të nderuar dhe respektuar fanellën që kanë të veshur. Prandaj dhe tashmë mbetet të shohim sjelljen e tyre në fushë, duke nisur nga takimi i sotëm me Lushnjën.
© shkodrasport.com
