Ndonëse ka qenë një ambjent që nuk kishte të bënte me futbollin, ai I pritjes së Kampionit të Europës në peshëngritje- Erkand Qerimaj, kryebashkiaku I Shkodrës nuk kishte se si të mos ngacmohej në lidhje me deklaratën e ish-trajnerit të Vllaznisë Rudi Vata që pat thënë se ndihej I “prerë në besë” nga Lorenc Luka. Pikërisht në lidhje me këtë çështje, ka ardhur edhe reagimi I numrit 1 të qytetit të Shkodrës, por njëkohësisht edhe numrit 1 të Vllaznisë që ka thënë:
“Unë kam prerë në besë Vatën? Nuk e di çfarë lidhje ka kjo gjë me mua por nëse Rudi Vata ka thënë kështu, mendoj se ka gabuar. Unë nuk kam prerë asnjë njeri në besë. Përkundrazi, më I qetë se ka punuar ai, nuk mund të punojë kush. Ka patur të gjithë mbështetjen e klubit dhe të drejtuesve. Por Rudi duket se I ngatërroi vetë punët. Në vend që të bënte vetëm punën e trajnerit, deshi të bënte edhe atë të shefit të klubit dhe shumë funksione të tjera. Prandaj dhe nuk është e mira të flasë ashtu sepse askush nuk e ka prerë në besë, as nuk e ka tradhëtuar kush. Kishim një marrëveshje që nuk u mbyll ashtu siç duhet, më shumë për fajin e tij se për fajin tonë dhe këtu duhet ta mbyllim. S’mund të vazhdojmë me polemika të kota”. Përgjigja e kryebashkiakut- president është e qartë. Ai është në krahun e drejtuesve të tjerë të klubit dhe nuk mendon se ish-trajnerit I ka mbetur ndonjë mbështetje pa dhënë prandaj dhe fjala “prerje në besë” nuk I pëlqen aspak kur përmendet.
Gjergj KOLA
