Ardit Krymi është optimist se Vllaznia i ka mundësitë që të shkojë në fund të këtij sezoni në Europë. Ai e beson këtë, duke luftuar qoftë nga Kupa e Shqipërisë, ashtu edhe nga kampionati.
Në një intervistë për “Panorama Sport”, Krymi tregoi për ndryshimet që kanë ndodhur në skuadër dhe pritjen me padurim të startit të sezonit 2020-2021.
Sipas tij, Vllaznia është më gati se kurrë për ta nisur kampionatin me një fitore në stadiumin “Loro Boriçi” ndaj Apolonisë, nesër në 16:45.
Ardit, të dielën e nisët sezonin me një fitore të thellë në Kupë. Dukej sikur ekipi mezi kishte pritur të luante…?
Të them të drejtën, gjithsecili prej nesh mezi e priti që të startonte ky sezon. Mezi e kemi pritur, pasi shkoj shumë gjatë edhe jemi përgatitur jo pak për këtë punë. Tani për ne nis puna e vërtetë.
Mund të jetë një nga objektivat e Vllaznisë fitimi i Kupës?
Kupa të jep të drejtën për të hyrë në Europë. Mendoj se është edhe rruga më e shkurtër për të shkuar në Europë, prandaj pse të mos e tentojmë një gjë të tillë. Mundësitë i kemi dhe duhet që ta tentojmë. Fitorja ndaj Devollit tregon se ne jemi gati për këtë sezon.
A mund të thuhet se Vllaznia është më shumë se gati për sfidën e parë në kampionat ndaj Apolonisë?
Kemi kohë që punojmë për këtë qëllim. Ne shpresojmë që atë punë që kemi bërë ta shfaqim në kampionat. Kemi marrë të gjitha ato që na duhen në këtë periudhë.
Me fierakët zhvilluat edhe një miqësore në muajin shtator, ku gjithçka u mbyll në barazim…?
Nuk ka sfida të lehta. Unë pres që çdo ndeshje të jetë e vështirë. Ne do të kërkojmë që të bëjmë maksimumin që në start. Nuk duhet që të gabojmë siç edhe kemi gabuar në sezonin që shkoi në takimet brenda në Shkodër.
E njohim këtë ekip, pasi zhvilluam një miqësore. Është një ekipi me djem të rinj, skuadër shumë e simpatike që mund të na nxjerrë jo pak punë. Duhet të bëjmë kujdes në këtë drejtim.
Fitorja është objektivi i vetëm për këtë takim?
Absolutisht që nuk do të kemi asnjë alternativë tjetër veç fitores.
Cili do të jetë synimi real i Vllaznisë për këtë sezon?
Mendoj se objektivi do të jetë renditja mes më të mirave dhe të tentojmë Kupat e Europës. E shikoj si të mundshme një gjë të tillë. Megjithatë, për të mbërritur deri këtu duhet që të marrim të gjithë takimet një e nga një. Duhet të bëjmë sa më pak gabime, pasi na pret një sezon i gjatë dhe i vështirë.
