Ditë të nxehta për futbollin botëror janë këto të fundit, shoqëruar me diskutime të shumta për ndeshjet e Botërorit që po zhvillohet në Rusi.
Ajo që të bie në sy është prania e shumë njerëzve të futbollit në studiot e
ndryshme sportive gjatë emisioneve që ato organizojnë për këtë eveniment.
I vetmi ndoshta që mungon është një emër shumë i njohur, Ramazan Rragami. Shumëkujt kjo gjë i ka bërë përshtypje dhe për më tepër që një specialist i tillë nuk ka qenë i pranishëm as në analizat e zhvilluara për Vllazninë.
Por ajo që mësojmë është se Mjeshtri i Merituar i Sportit nuk ndodhet në Shqipëri prej disa muajsh.
Bashkë me bashkëshorten e tij ka udhëtuar drejt Shteteve të Bashkuara të Amerikës për të qenë pranë fëmijëve të tyre që jetojnë atje prej vitesh.
Ndonëse në moshën 74 vjeçare profesor Rragami gëzon një shëndet shumë të mirë dhe me siguri që pas kthimit të tij në Shkodër, ai do të jetë sërish i pranishëm në studiot dhe ambjentet sportive.
© shkodrasport.com
