Kualifikimi në një ndeshje direkte gjithmonë të dhuron emocione. Kështu i ka ndodhur futbollistëve dhe stafit teknik të ekipit Vllaznia U17 ditën e sotme kur ato u kualifikuan ndaj Internacional në ndeshjen e turit të parë të Kupës së Shqipërisë.
Ato kanë fituar me rezultatin 2-1 në takimin e luajtur mesditën e sotme në kompleksin e ekipeve kombëtare në Kamëz. Ka ndodhur kështu në një ndeshje që ka patur brenda shumë emocione, por edhe me luftë të fortë sportive, nganjëherë edhe jashtë normale, aq sa u dhanë disa kartona të verdhë, madje në pjesën e dytë edhe një i kuq.
Por ajo që duhet evidentuar në këtë ndeshje është aktivizimi i portierit 14 vjeçar Tomas Kiri. Mëse e vërtetë: Në fushë ka qenë një futbollist i datëlindjes 2005 duke luajtur me kundërshtarë tre vjet më të mëdhenj, pra lojtarë të datëlindjes 2002.
Dhe Tomasi ia ka dalë me sukses të bëjë një paraqitje shumë të mirë për 80 minutat e ndeshjes duke treguar pjekuri dhe siguri në lojën e tij. Pranë ka patur edhe legjendën e portës Paulin Ndoja që tashmë e stërvit çdo ditë dhe me siguri që ai ka parë shumë talent tek Tomasi.
Një portier i së ardhmes po rritet tek Akademia Vllaznia. Provën e parë e kaloi me sukses, por me siguri që shumë të tilla ka për të kaluar në të ardhmen.
© shkodrasport.com
