Gjatë ditës së djeshme, tifozët e flamurtarit kanë reaguar keq ndaj humbjes që skuadra e tyre pësoi ndaj Kastriotit me rezultatin 1-0 dhe punonjësi i Flamurtarit, Çimi Rama ka reaguar në “Facebook” me anë të komenteve duke u shprehur se Ramadan Ndreu, zyrtar i klubit të Kukësit kishte dhënë para për gjyqtarët në mënyrë që të dëmtonin Flamurtarin.
Komentet u pasqyruan sot në gazetën “Panorama Sport” dhe pas akuzave nga drejtuesit e klubit vlonjat, ka ardhur edhe reagimi nga Kukësi. Nëpërmjet një komunikate në rrjetin social “Facebook”, klubi i Kukësit ka hedhur poshtë akuzat e Flamurtarit dhe shton se në rast se të njëjtat akuza përsëriten, atëherë do të merren masa.
“Reagim!
Duke iu referuar artikullit të botuar në gazetën ‘Panorama Sport’ ditën e sotme, bëjmë me dije të gjithë opinion sportiv, se Futboll Klub Kukësi asnjëherë nuk është përfshirë dhe as nuk do të përfshihet në situata të tilla, për të ndikuar në rezultatet e klubeve kundërshtare, pasi ne interesohemi vetëm për ecurinë e skuadrës sonë.
Drejtori i Menaxhimit në klubin tonë, Ramadan Ndreu, gjatë ndeshjes Kastrioti – Flamurtari ndodhej si ish-drejtues në këtë përballje, pasi ai është edhe banor i qytetit të Krujës.
FK Kukësi njofton, se në rast përsëritje të situatave të tilla do t’i drejtohemi organeve kompetente, pasi nuk lejojmë që të prishet imazhi i klubit me SHPIFJE të ulëta”, shkruhej në reagim./VipSport/
