Pas dy ndeshjeve të ditës së djeshme, Superliga shqiptare do të vazhdojë sot me dy takime të tjera që do të zhvillohen pasdite. Fillimisht në orën 14.00 në Kukës do të luajë skuadra vendase ndaj Vllaznisë dhe më pas, në orën 17.00 në Tiranë do të ndeshen Partizani- Flamurtari. Federata Shqiptare e Futbollit ka zbuluar edhe emrat e arbitrave që do të gjykojnë në këto takime.
Kështu, në “Zeqir Ymeri”, Vllazninë do ta arbitrojë lushnjari Laver Alla. Ai do të jetë i ndihmuar nga Devis Koreshi dhe Marjus Qose ndërsa arbitër i katërt do të jetë lezhjani Eldorjan Hamiti. Sakaq, delegat i FSHF-së do të jetë shefi i Sektorit të Garave Lysien Nurishmi ndërsa vëzhgues Albano Janku. Kuqeblutë e trajnerit Gjoka padyshim që kërkojnë një arbitrim korrekt sepse në shtatë ndeshjet e deritanishme përgjithësisht kanë qenë të kënaqur me mënyrën si kanë shkuar gjërat dhe këtë gjë kërkojnë edhe për ndeshjen e sotme.
www.shkodrasport.com
