Pasi prezantoi Kupën e re të Botës për Klube, FIFA tani po shqyrton zgjerimin e Kupës së Botës për ekipet kombëtare përtej 48 skuadrave që do të garojnë duke filluar nga edicioni i ardhshëm në 2026 në SHBA, Kanada dhe Meksikë. Siç raporton gazeta amerikane The New York Times, organi më i lartë i futbollit botëror po shqyrton një revolucion në të ardhmen e afërt.
Në fakt, flitet për një Botëror me 64 ekipe, duke filluar nga edicioni i 2030-ës që do të luhet në Spanjë, Marok dhe Portugali me ndeshje që do të luhen edhe në Argjentinë, Paraguaj dhe Uruguai, për të festuar njëqindvjetorin e edicionit të parë të turneut që u luajt në Uruguaj në vitin 1930.
Ky propozim për të zgjeruar më tej numrin e ekipeve kombëtare pjesëmarrëse vjen nga delegati i FIFA-s i Uruguait, Ignacio Alonso, i cili shprehu idenë e tij në margjinat e një takimi të delegatëve, i cili u prit me një heshtje të përgjithshme që u cilësua si “i shtangur”.
Por sipas asaj që është zbuluar, FIFA nuk do të ishte aq larg kësaj ideje dhe, në të vërtetë, do të vlerësonte me kujdes çdo implikim për këtë ndryshim të mundshëm formati, veçanërisht për përfitimet e mundshme financiare dhe politike si dhe ato sportive kur do të duhej të merrte një vendim për këtë çështje.
Duket se propozimi ka tërhequr vëmendjen e presidentit të FIFA-s, Gianni Infantino, i cili e cilësoi atë si interesant dhe të denjë për studim të mëtejshëm në muajt në vijim.
