Kupa e zhvilluar me rastin e 70 vjetorit të lindjes së futbollistit të madh Sabah Bizi është përmbyllur sot me ceremoninë e shpalljes së fituesve të saj.
Pas ndeshjeve finale, ekipet fituese sipas grupmoshave janë shpallur ato të Shkodrës për U-11 që ka fituar në finale ndaj Shpresës, të Vllaznisë për U-13 që ka mundur Shkodrën në finale dhe të Skutarit për U-15 që fitoi me penallti ndaj Vllaznisë në finale.
Njëkosisht, Zyra Rajonale e Federatës Shqiptare të Futbollit si organizatore e kësaj kupe, ka vlerësuar edhe sportistët më të mirë sipas grupmoshave teksa të tillë kanë qenë Erdino Isufi i ekipit Shkodra për grupmoshën U-11, Tomas Kiri i Vllaznisë për grupmoshën U-13 dhe Enez Papaj po i Vllaznisë për grupmoshën U-15.
Për ta janë dorëzuar çertifikata dhe dhurata nga ish- futbollistë të njohur të Vllaznisë në vite të cilët kanë qenë të pranishëm në këtë ceremoni.
Por padyshim që emocionet më të mëdha ka qenë në momentet kur vetë mjeshtri Sabah Bizi ka dorëzuar kupat për ekipet fituese.
Hysen Zmijani, njeriu që e realizoi një kupë të tillë ka shprehur vlerësimin për figurën e Bizit që natyrisht meriton shumë më tepër.
Në këtë kupë janë dhënë edhe dy çertifikata për arbitrat më të mirë, kryesorin Noris Kozmaj dhe asistentin Besard Pepnikaj.
Mbi të gjitha rëndësi ka nderimi që I është bërë mjeshtrit Sabah Bizi, një emblemë e futbollit shkodran dhe atij shqiptar.
© shkodrasport.com
