Ashtu si para ndeshjes me Kukësin, edhe këtë herë në pragndeshjen me Bylisin, ekipi i Vllaznisë do të grumbullohet një natë përpara. Për rrjedhojë pasditen e sotme pasi ekipi të ketë mbaruar seancën e fundit stërvitore, do të mblidhet në Grand Hotel “Europa” ku do të kalojë natën. Gjatë kësaj periudhe të qëndrimit aty, sigurisht që do ketë edhe një takim me presidentin Çela për të diskutuar në lidhje me këtë ndeshje. Ajo që vlen për këtë sfidë të rradhës sigurisht që është vetëm fitorja. Për ta arritur atë natyrisht që nuk do jetë e lehtë, përkundrazi do kërkohet përkushtim maksimal nga të gjithë futbollistët. Bylis në Shkodër ka dhuruar shpeshherë takime të bukura e për rrjedhojë të njëjtën gjë do të kërkojë të bëjë edhe nesër. Drejtuesit e klubit shkodran ende nuk kanë bërë të ditur nëse do të ketë premio në rast fitoreje megjithatë edhe pa të, futbollistët e Vllaznisë janë të motivuar për të kërkuar fitoren. Në 9 ndeshjet e mbetura deri në fund të kampionatit pritet që ata të impenjohen maksimalisht që të marrin sa më shumë pikë dhe për të shpresuar deri në fund për një vend që e çon në Kupat e Europës. Megjithatë kjo do të jetë shumë e vështirë sepse me eliminimin e Flamurtarit nga kupa, zvogëlohen edhe më shumë mundësitë që vendi i katërt në kampionat të përfitojë për të qenë në Europë. Fakti që janë pesë skuadra në luftë për dy vende, e tregon më së miri vështirësinë e arritjes së kësaj gjëje megjithatë shkodranët do të bëjnë të pamundurën deri në fund.www.shkodrasport.com
