Mbrëmjen e së martës trajneri i ekipit kombëtar, Christian Panucci, publikoi listën e lojtarëve të grumbulluar për dy ndeshjete rradhës, atë ndaj Jordanisë dhe Izraelit, që do të luhen javën e ardhshme.
Mes futbollistëve të grumbulluar binte në sy edhe emri i mbrojtësit Kastriot Dermaku, që në fakt ishte befasi për shumë kënd. Më herët ai ishte grumbulluar nga Skënder Gega, kur ky i fundit trajnonte Shpresat e Shqipërisë, por më pas ishte lënë në harresë.
Ndërkohë që pak kohë më parë, Kastriot Dermaku, u grumbullua nga Kosova, teksa nuk u aktivizua në asnjërën nga ndeshjet me Azerbajxhanin dhe Ishujt Faroe. Ndërkohë pas vendimit të mbrojtësit për t`u grumbulluar me Shqipërinë, ka ardhur dhe reagimi i parë nga Kosova.
Menaxheri i përfaqësueses së Kosovës, Bajram Shala, ka folur për gazetën kosovare “Insporti”, duke theksuar se vendimi Dermakut është personal.
“Është zgjedhje personale e lojtarit të cilën në e respektojmë. Ndoshta lojtari nuk ka arritur që të adaptohet. Ndoshta nuk është ndjerë mirë. Ndoshta e ka parë konkurrencën, nuk e di se çfarë të them më tepër”, ka deklaruar Bajram Shala.
Ai ka mohuar kategorikisht mundësinë që Dermaku ka pasur ndonjë problem te Kosova. “Absolutisht nuk ka pasur asnjë problem gjatë kohës sa ka qenë i tubuar me Kosovën”, theksoi Bajram Shala./telesport/
