Problemet e shumta që shoqëruan ekipin e volejbollit të meshkujve të Vllaznisë në këtë fillim-kampionati, mund të pasohen së fundmi edhe me ndonjë lajm të mirë. Largimet dhe dëmtimet e disa sportistëve padyshim që kanë dobësuar ekipin por pikërisht në këto momente, një nga lojtarët e talentuar të këtij ekipi, pikërisht Kristian Kola, ka vendosur t’i rikthehet stërvitjes.
Ai pikërisht gjatë sezonit të kaluar, konkretisht në kupën “Pavarësia” që u zhvillua në Maqedoni dhe që u fitua nga Vllaznia, u dëmtua rëndë në gju. Dëmtimi konsistoi në këputje të ligamenteve të gjurit, çka e detyroi t’i nënshtrohej një ndërhyrje kirurgjikale, por kjo bëri që ai ta mbyllte sezonin. Gjatë verës, Kola zhvilloi periudhën e terapisë ndërkohë që në periudhën kur ekipi nisi përgatitjet për sezonin e ri, ai nuk e bëri një gjë të tillë. Madje, për njëfarë periudhe vendosi ta braktiste përfundimisht sportin. Por ditët e fundit ai ka ndryshuar sërish mendje dhe i është bashkuar ekipit në stërvitje. Kuptohet që Kristian Kola nuk është në formën e tij më të mirë por padyshim që brenda një periudhe të shkurtër do të jetë në dispozicion të trajnerit Mikopli dhe sigurisht që ky është një lajm i mirë sepse ai pritet të jetë sërish një nga elementët më të rëndësishëm të këtij ekipi.
© shkodrasport.com
