Tashmë nuk ka më vend për dyshime. Kreshnik Krepi nga mbrëmja e sotme do të jetë trajneri i ri i Adës së Velipojës. Kjo konfirmohet si nga ai ashtu edhe nga presidenti i këtij klubi Alfred Pjetri. Të dy ata kanë patur një takim paraditen e sotme por pa arritur të mbyllin marrëveshjen. Për këtë arsye, janë takuar sërish në orët e mbrëmjes së sotme dhe në fund është arritur akordi. Që do të thotë se Krepi do të drejtojë ekipin velipojak duke nisur nga dita e nesërme kur do jetë i pranishëm në seancën stërvitore. Presidenti Pjetri duke folur në lidhje me këtë lajm të fundit ka thënë: “Ne u gjendëm disi të papërgatitur nga dorëheqja e parevokueshme e trajnerit Besnik Duli. Ai pas humbjes në Mamurras më deklaroi se nuk mund të vazhdonte më punën me skuadrën tonë. Në fakt unë e falenderoj për gjithë atë çfarë ka bërë për skuadrën gjatë kësaj periudhe ndonëse na kanë munguar rezultatet por kurrë nuk kam dyshuar tek aftësia e tij si trajner dhe ndjehem mirë që kam punuar me të gjatë kësaj periudhe. Ndërkohë pas largimit të tij, sigurisht që do gjenim një trajner tjetër dhe më mirë se Kreshnik Krepi nuk kishte tjetër. Ai ka qenë shumë pranë pankinës së Adës edhe në verë por duket se paska qenë e shkruar që të kthehet tani tek ne dhe sëbashku do bëjmë çmos për kthimin e situatës”. Dy fjalë ka thënë edhe trajneri Krepi për gazetën www.shkodrasport.com: “Nuk mund t’i thoja “jo” mikut tim Fred Pjetri. E kam të qartë se Ada ndodhet në pozita aspak të mira por sëbashku të gjithë ne mendoj se do ia dalim”. Interesant është fakti se ditën e mërkurë luhen ndeshjet e javës së pesë të kampionatit dhe Ada e trajnerit Krepi do të presë Veleçikun e ish- trajnerit Krepi. Kush do fitojë, “Krepi i ri” apo “Krepi i vjetër”? Këtë do të tregojë fusha e “Ismail Xhemalit” të Pukës ku do të zhvillohet ndeshja.Gjergj KOLA
Presidenti Pjetri dhe trajneri Krepi sonte ne takimin qe vendosi per emerimin e tij si trajner i Ades
