Lamine Yamal (17 vjeç) vazhdon të shkruajë historinë me Barcelonën. Në fitoren e vështirë ndaj Alavés (1-0), talenti i ri katalanas ishte një nga lojtarët më të spikatur në fushë, duke treguar aftësitë e tij të jashtëzakonshme në driblim.
Nga momentet më të komentuara ishte një aksion i tij i jashtëzakonshëm, ku la pas pesë mbrojtës, duke dëshmuar edhe një herë aftësinë e veçantë për t’i dribluar kundërshtarët me lehtësi.
Sipas të dhënave të “Opta”, Yamal ka thyer një rekord historik të Lionel Messit në La Liga. Ylli i ri katalanas e përfundoi ndeshjen ndaj Alavés me 11 driblime të suksesshme nga 21 të tentuara, duke tejkaluar rekordin e mëparshëm të Messit, i cili kishte realizuar 10 driblime nga 20 tentime në një ndeshje ndaj Mallorca, në vitin 2007.
Pas kësaj super paraqitjeje, Lamine Yamal e forcoi edhe më shumë pozitën e tij si dribluesi më i mirë në La Liga këtë sezon, duke regjistruar 73 driblime të suksesshme. Ai kryeson listën përpara Dodi Lukébakio të Sevilla (64 driblime) dhe Kylian Mbappé të Real Madridit (46 driblime).
Me performanca të tilla, Lamine Yamal vazhdon të tregojë se është një nga talentet më të mëdhenj në futbollin europian dhe një aset i çmuar për të ardhmen e Barcelonës./telesport/
