Xavi Hernández nuk e konsideron rivalitetin e ashpër historik të klubit të tij të zemrës me Real Madridin, kur është fjala për “t’i dhënë Cezarit atë që është e Cezarit”. Në një intervistë me “Catalunya Ràdio”, ish-kapiteni dhe legjenda e Barcelonës analizoi momentin e keq të të bardhëve, duke mbrojtur punën e Lopetegui.
“Me Lopetegui trajner, Real Madridi luajti në mënyrë më të rregullt dhe pozicionale. Historikisht, Real Madridi është udhëhequr nga lojtarët lider. Në vend të kësaj, Julen u përpoq të luante më shumë si një ekip. Por, duket se ekosistemi që preferojnë aty është i ndryshëm.
Dhe kjo nuk është indirekt kritikë për Lopetegui, sepse është mënyra e tyre e të luajturit. Ju kurrë nuk mund ta konsideroni “të vdekur” Real Madridin, sepse nuk dorëzohet deri në maj. Gjithmonë ka mbetur diçka, për të cilën duhet të luftojë”, – tha ai.
Xavi, gjithashtu, vlerësoi Luca Modric, për të cilin tha se “është shumë inteligjent dhe më i fortë se unë. Isha i lumtur që fitoi çmimin e më të mirit. Messi bën shumë gjëra, më shumë se çdo lojtar tjetër. Tani që Cristiano Ronaldo ka shkuar te Juventusi, unë do të doja të dija se çfarë mendojnë madrilenët për “Topin e Artë”.
