Akademia Vllaznia aktualisht ka nëntë ekipe të grupmoshave të ndryshme, që nga U-10 deri tek U-19 dhe pjesë e tyre padyshim që janë edhe një mori portierësh të cilët stërviten çdo ditë plot pasion. Në krye të tyre është trajneri Ideal Lekiqi i cili punon me shumë dëshirë me ta. Ky trajner në fakt për një periudhë njëmujore punoi edhe pranë ekipit të parë krahas Cungut derisa erdhi trajneri Gjoka me stafin e vet.
Edhe pas largimit nga ekipi i parë, Lekiqi do deklaronte se priste që portieri Sherri të ishte në portën e Vllaznisë sepse të gjitha të dhënat flasin për një portier me shumë të ardhme.
Duke folur për “Shkodra Sport” në lidhje me këtë çështje, ai deklaron: “E kam thënë me shumë bindje se Sherri është një portier që garanton portën për disa vite dhe jam shumë i kënaqur që atij po i besohet nga stafi aktual i Vllaznisë. Jam shumë i bindur se drejtuesit e klubit nuk do të kenë nevojë të shohin më në merkato për këtë repart sepse porta besoj do të jetë e garantuar”. Sakaq, trajneri i portierëve të Akademisë kuqeblu flet edhe për atë që stërvit çdo ditë kur thotë: “Nëse për Sherrin jam i bindur se do të ketë sukses, jo pa të ardhshme janë edhe disa portierë të tjerë tek Akademia. Dua të përmend aktualisht tre prej tyre, atë të ekipit U-19 Kristi Qarri, atë të ekipit U-17 Klodian Harusha dhe atë të ekipit U-13 Tomas Kiri. Po punojmë shumë me to në mënyrë që të rrisim parametrat teknikë dhe taktikë sepse porta e Vllaznisë duhet të marrë garancinë edhe për shumë vite të tjera”.
© shkodrasport.com
