Për një muaj ka punuar në stafin e Cungut pas largimit të trajnerit të mëparshëm të portierëve Avenir Cani dhe pikërisht gjatë kësaj periudhe, në portën e Vllaznisë për dy ndeshje rresht është aktivizuar 20 vjeçari Alen Sherri. Trajneri Ideal Lekiqi që tashmë stërvit portierët e Akademisë Vllaznia duke folur në lidhje me këtë çështje në emisionin “Sport Arena”, do deklaronte:
“Të them të drejtën nuk e kuptova pse u bë sërish ai ndryshim menjëherë sa erdhi stafi i ri. Ndoshta i kanë menduar mirë gjërat por dua të them se Sherri në dy ndeshjet që u aktivizua, u paraqit shumë mirë. Sidomos ndeshjen me Kamzën ka bërë gjithçka mirë dhe nuk ka sesi një portier të luajë më mirë. Mendova se do të vazhdonin t’i besonin atij edhe stafi i ri por duket se ata kishin ide tjetër. Gjithsesi, ju siguroj se porta nuk është problemi i Vllaznisë. Ndoshta është problemi më i vogël që ajo ka por duke qenë e gjithë skuadra me probleme, sigurisht që ato reflektohen edhe tek portierët”.
© shkodrasport.com
