Prej disa javësh, portën e Vllaznisë po e mbron Alen Sherri. 20 vjeçari nga ndeshja në ndeshje po shndërrohet në protagonist dhe gradualisht është shndërruar në pikë referimi për këtë skuadër.
Njëri nga trajnerët që e ka stërvitur për njëfarë periudhe gjatë këtij sezoni, pikërisht Ideal Lekiqi, trajneri që ishte në stafin e Cungut, në periudhën shtator- tetor të vitit të akluar, duket shumë i kënaqur me paraqitjet e tij.
“Që në momentin kur unë kam qenë pjesë e stafit të Vllaznisë, kam besuar se kishte ardhur momenti që ai të luante si titullar.
E aktivizuam në dy ndeshje dhe ai e justifikoi në mënyrën më të mirë të mundshme. Jam shumë i kënaqur me mënyrën si po luan edhe tani.
Aleni bën stërvitje në mënyrë perfekte. Ai është shembulli më i mirë i sportistit që stërvitet, sakrifikon me objektin e qartë për t’u bërë dikush dhe atëherë nuk mundet të të ndalë asgjë në botë.
Sigurisht që nuk ka arritur asgjë dhe për t’u bër “dikushi”, madje për të shkuar edhe më lart, duhet të vazhdojë të punojë me të njëjtën dëshirë.
Jam shumë i kënaqur me mënyrën si ka luajtur në këto ndeshjen e fundit, kuptohet me ndonjë gabim të vogël por e përgjithshmja ka qenë e mirë.
Ai ka fituar besim por edhe po jep besim tek ekipi sepse e shoh edhe tek loja që zhvillohet. Futbollistët e tjerë po e angazhojnë në lojë, i kthejnë shpeshherë topat pas e kjo tregon se ato kanë besim tek ai. Kjo është shumë pozitive.
Shpresoj të vazhdojë kështu që të bëhet një portier i padiskutueshëm për Vllazninë por të synojë edhe për më lart”- shprehet Lekiqi i cili tani kryen detyrën e trajnerit të portierëve pranë Akademisë Vllaznia.
© shkodrasport.com
