Lëvizje e papritur në stafin teknik të Kombëtares. Trajneri Kristian Panuçi do të ketë një ndihmës të ri tani e tutje dhe bëhet fjalë për një ish-futbollist të Romës.
Federata nuk e ka zyrtarizuar ende si lajm, në fakt.
Lajmi bëhet i ditur nga shtypi në Itali, nga “Sky Sport”, që saktëson se Marko Kaseti do të jetë ndihmës i Panuçit te Shqipëria. 40-vjeçari, pasi ka varur “këpucët në gozhdë”, do të nisë një aventurë të re në stolin e Kombëtares shqiptare.
Kaseti dhe Panuçi takohen sërish, pas përvojës te Roma si lojtarë.
Marko Kaseti do të zëvendësojë në rolin e ndihmëstrajnerit Paolo Rodolfin.
Ky i fundit do të marrë detyrën e vëzhguesit nga Federata Shqiptare e Futbollit. Kaseti do të jetë në krah të trajnerit Panuçi në miqësoret e radhës, që janë planifikuar në fund të muajit maj.
Si futbollist ai ka luajtur edhe me Veronën, Udinezen, Leçen dhe Uatfordin në Angli. / Vipsport/
