Prej dy ditësh në media është bërë fakt i kryer emërimi i Hasan Likës në postin e trajnerit të Vllaznisë. Madje, vetë tekniku i njohur e ka pohuar këtë gjë në media duke thënë se do të ishte kënaqësi për të punuar me administratorin e sapoemëruar të klubit, ish- futbollistin e njohur të kësaj skuadre Suad Lici.
Por vetë ky i fundit nga sa bëhet e ditur, ditën e sotme është shprehur në një rreth të ngushtë dhe ende nuk ka asgjë konkrete sa i takon çështjes së trajnerit.
Sipas tij, do të jetë një studim i hollësishëm i të gjitha kandidaturave që kanë dalë kohët e fundit për postin e trajnerit të Vllaznisë dhe në fund, në mënyrë kolegjiale bashkë me Këshillin Mbikëqyrës apo dhe drejtues të tjerë, do të vendoset për kandidaturën më të përshtatshme për drejtimin e skuadrës.
Gjithsesi, do të jetë vetë Lici që me siguri do ta shpjegojë këtë gjë në konferencën e nesërme për shtyp.
© shkodrasport.com
