Ndeshjet e katërta në fazën në grupe kanë zbuluar emrat e 6 skuadrave të cilat në bazë të rezultateve të këtyre sfidave, kanë prerë biletën për në turin tjetër të turneut.
Ashtu siç pritej, në Grupin A është Bajern Mynih që ka vendosur diktatin dhe që tani jo vetëm është kualifikuar, por edhe ka siguruar vendin e parë dhe vazon e ekipeve më të forta për shortin e turit të ardhshëm.
Në Grupin C është Real Madrid që po ashtu ka siguruar 4 fitore, por nuk ka blinduar ende vendin e parë, ndonëse së shpejti pritet ta bëjë zyrtar.
Fitoret e sotme në Grupin D i kanë dhënë Real Sociedad dhe Interit mundësinë që të vazhdojnë më tej në turne, ndërsa do të diskutojnë mes tyre në ndeshjet e mbetura se kush do të jetë e para në grup meqë kanë të dyja nga 10 pikë.
Ndërsa në Grupin G, është Mançester Siti që ka siguruar biletën për më tej me fitoren e katërt radhazi, bashkë me Lajpcig që e ndjek në fazënë me kualifikim direkt me 3 pikë më pak.
