Shqipëria e femrave ka gjetur sot fitoren e parë në Ligën B të Ligës së Kombeve. Ekipi i drejtuar nga Armir Grima, ka triumfuar në Shkodër me rezultatin e pastër 4-0 ndaj Kroacisë, për të marrë tre pikë që e mbajnë në lojë për të shmangur rënien direkte në Ligën C.
Ndeshja foli që në fillim për Shqipërinë, pasi Berisha gjeti rrugën e rrjetës që në minutën e 14-të, ndërsa 10 minuta më vonë ishte Hilaj e cila dyfishoi shifrat. Dominimi kuqezi vazhdoi edhe në pjesën e dytë, ku Doçi e Hamonikaj shënuan përsëri për të vulosur fitoren 4-0.
Me këtë sukses, Shqipëria shkon në kuotën e 3 pikëve pas 3 ndeshjeve, ndërsa ndjek nga larg Çekinë e Ukrainën që janë favoritet e grupit dhe diskutojnë ngjitjen në Ligën A.
Objektivi i këtij sezoni për vajzat kuqezi është që të sigurojnë qëndrimin në Ligën B.
