Ligji për Sponsorizim konsiderohet si shpëtim për sportin kosovar. Viti 2018 duket se do të jetë viti i këtij Ligji, pasi ai pritet të vihet në funksion pas një pritjeje të gjatë, shkruan sot gazeta Zëri.
Ministria e Sportit (MKRS) gjatë gjithë procesit të hartimit të Projektligjit për Sponsorizime në fushën e Kulturës, Rinisë dhe Sportit ka konsultuar të gjithë akterët e mundshëm dhe pas procedurave të rregullta e ka proceduar Projektligjin në Qeveri.
Më pas në Komisionin Parlamentar, të udhëhequr nga Nait Hasani, është konsultuar prapë Projektligji dhe nga aty ka dalë propozimi që në fushën e sportit zbritja nga tatimi në fitim të lejohet në 30%, në krahasim me 20% sa ishte paraparë fillimisht.
Dhe, në MKRS thonë se këtij Ligji pritet t’ia shohë hairin sporti dhe se ai do të ndikojë drejtpërdrejt në ngritjen e cilësisë në këtë fushë.
“Në fakt ky Ligj bën një favorizim të lehtë te sporti, por që edhe kultura dhe rinia do të përfitojnë nga përqindja e liruar për këto dy fusha”, thotë fillimisht për “Zërin” Samir Hoxha, këshilltar i ministrit të Sportit Kujtim Gashi.
“Ne besojmë shumë që ky ligj do të ndikojë direkt në përmirësimin e cilësisë në sport dhe njëkohësisht do të ndikojë edhe te kultura dhe rinia, të cilat për ne si Ministri janë të pandashme”, vazhdoi ai.
Por, kur do të priten rezultatet nga futja në “lojë” e këtij Ligji, i cili pritet t’i joshë bizneset dhe biznesmenët të investojnë në sport pasi do të lirohen nga një pjesë e tatimeve ndaj shtetit, ndërkohë që përmes sportit do të mundë t’i reklamojnë bizneset e tyre në rrafshin vendor dhe ndërkombëtar.
Madje po mendohet të niset një fushatë për vetëdijesimin e bizneseve. “Rezultatet e para priten menjëherë, tani jemi në fazën e promovimit të Rregullores.
Në bashkëpunim me Komitetin Olimpik të Kosovës ne kemi formuar një ekip dhe e kemi bërë një plan që gjatë këtyre muajve të dalim nëpër të gjitha komunat e Kosovës, ku do të mblidhen të gjithë të interesuarit për ketë proces dhe do të informohen drejtpërdrejt nga hartuesit e saj.
Në këtë rast ne do të kemi edhe fushata mediale dhe të formave të tjera për promovimin e Rregullores”, përfundoi Hoxha.
