Lojërat Olimpike Rinore për vitin 2018, do të mbahen në Argjentinë dhe pjesë e këtij evenimenti sportiv do të jetë edhe Shqipëria me përfaqësuesit e saj. Ditën e sotme presidenti Ilir Meta u ka dorëzuar flamurin kombëtar, Ekipit Olimpik Shqiptar që do të na përfaqësojë në këtë eveniment.
“Flamuri kuqezi, uroj të jetë energji dhe frymëzim i tyre, për ta ngritur sa më lart autoritetin e Shqipërisë në arenën sportive ndërkomëbtare” – shkruan Meta në “Facebook” duke e shoqëruar edhe me një “emoji” të flamurit shqiptar.
Në fjalën e tij përshëndetëse në këtë ceremoni, Presidenti Meta duke iu drejtuar sportistëve, të cilët do të garojnë në disiplina të ndryshme si boks, peshëngritje, atletikë dhe not, vuri në dukje se në këto Lojëra Olimpike ekipi ynë kombëtar i të rinjve i ka të gjitha mundësitë që falë talentit, pasionit rinor për sportin dhe përkushtimit të tyre, të arrijnë rezultate mbresëlënëse.
“Dua t’ju shpreh sot mirënjohjen time për angazhimin serioz në përgatitjen e delegacionit sportiv për Lojërat Olimpike Rinore 2018, që do të zhvillohen nga 6 -18 tetor në Buenos Aires, Argjentinë.
Me këtë rast dua t’iu shpreh fjalët më të mira, njëkohësisht edhe besimin në performancën tuaj të pritshme, që jo vetëm do t’ju rrisë ju si sportistë në këto sporte të bukura dhe të vështira, por urojmë që të ngrejë më lart autoritetin e vendit tonë në arenën sportive ndërkombëtare.
Gjithmonë kam ndjekur me interes aktivitetet tuaja sportive, në të cilat keni shfaqur gjithmonë vlerat e rëndësishme të shpirtit të garës, sidomos në këto ngjarje sportive elitare.” – tha Presidenti Meta.
“Me këtë rast ju uroj të jepni më të mirën, energjinë tuaj dhe aftësitë tuaja në garat ku ju do të garoni. Rezultati është njëra anë e suksesit tuaj, por kujtoni gjithmonë, që sporti është një element i çmuar dhe i pazëvendësueshëm që na ndihmon në rritjen e identitetit kombëtar, për të qenë gjithashtu sportistë të mirë dhe qytetarë të devotshëm.
Dua t’iu uroj juve dhe familjeve tuaja suksese në Lojërat Olimpike Rinore dhe njëkohësisht të gjitha institucioneve sportive në vend të japin kontributin e tyre, moral dhe material, për të krijuar një klimë të favorshme, për suksesin në pjesëmarrjen tuaj të rëndësishme.
Edhe një herë suksese dhe mbarësi në këtë garë të madhe botërore dhe rinore!” – u shpreh Presidenti Meta.
Duke i uruar suksese dhe përfaqësim sa më dinjitoz të ngjyrave kuq e zi, Presidenti i Republikës ia dorëzoi Flamurin Kombëtar boksieres shkodrane Elsidita Selaj, flamurmbajtëses së ekipit të të rinjve shqiptarë, e cila do te jete e shoqeruar edhe nga trajneri Jetmir Kuçi ne kete aktivitet.
“Ju falënderoj Zoti President për mikpritjen që na rezervuat! Dua të theksoj që është një nder i madh të mbaj Flamurin Kombëtar dhe së bashku me shokët e skuadrës të përfaqësojmë shtetin tonë në Lojërat Olimpike Rinore.
Shpresoj të bëjmë një paraqitje sa më dinjitoze që të kthehemi me rezultate sa më të larta!” – u zotua sportistja Selaj në emër të të gjithë Ekipit Olimpk Shqiptar të të Rinjve.
