Gjyqtari anësor i Superiores, me stemën e FIFA-s, Ridigert Çokaj, është me profesion infermier, teksa ndodhet në vijën e parë të zjarrit, në këtë situatë të jashtëzakonshme për shkak të Koronavirusit.
Çokaj punon në Spitalin Rajonal të Lezhës, ndërkohë që së fundmi dha një prononcim në emër të të gjithë mjekëve dhe infermierëve të Spitalit të Lezhës, për sa i përket shpërblimit të qeverisë.
Kryeministri Edi Rama u shpreh disa ditë më parë se për ta do të ketë një shpërblim prej 1 mijë eurosh. Gjithsesi duket se nuk do të ndodhë kështu dhe kjo konfirmohet nga ajo që ka ndodhur në Lezhë, ku për stafin mjekësor është akorduar një bonus prej 5 mijë lekësh të reja. Në lidhje me këtë situatë Çokaj u shpreh për “Abc News”:
“Jemi njohur më parë për vendimin e qeverisë në lidhje me shpërblimin që ka premtuar prej 1000 eurosh, por dje jemi kemi mësuar nga Drejtoria e Spitalit se janë akorduar 5 mijë lek të reja për stafin mjekësor.
Ne kemi vendosur që këto leke të kalojnë për familjet në nevojë. Spitali Rajonal i Lezhës ka qenë në gatishmëri dhe do të vazhdojmë të jemi te gatshëm që të ndihmojmë të gjithë ata që kanë nevojë për ndihmë mjekësore. Shërbimi është bërë dhe do të vazhdojë të bëhet me të njëjtën devotshmëri”.
