Nga Endri ÇINARI
Kur kanë mbetur 4 javë nga përfundimi i kampionatit, kalendari për Vllazninë nuk është aspak i lehtë. Kuqeblutë në garë për të kapur 2 vendet e para të Superiores, do kenë një “malore” përpara. Duke nisur nga kjo fundjavë, ku shkodranët udhëtojnë drejt Ballshit për tu ndeshur me vendasit e Bylis.
Një transfertë që historikisht ka rezultuar e vështirë dhe me mallakastriotët të “etur” për pikë, gjithçka mbetet e hapur në këtë duel. Pas kësaj ndeshjeje, Vllaznia do presë në shtëpi Dinamon në kuadër të javës së 34-ët. Një 90 minutësh që mund të vendosë gjithçka në garën për dy vendet e para të kampionatit, pasi dueli do jetë direkt me kryeqytetasit. Që kanë qenë një “mace e zezë” për Vllazninë këtë edicion, shkruan shkodrasport.com
Në javën e 35-të, Vllaznia viziton Elbasanin. Që aktualisht po lufton për t’iu bashkuar katërshes së parë. Dhe nëse distanca qëndron e tillë apo ngushtotet për verdheblutë, sfida ndaj tyre pritet shumë e fortë. Kampionati do mbyllet në përballjen ndaj Laçit për Vllazninë. Me ekipin e Brdariç që i pret kurbinasit në shtëpi në raundin e 36-të të edicionit 2024-25.
Duke parë ecurinë e kampionatit dhe luftën e ekipeve për mbijetesë, gjithçka duket se do jetë e hapur deri në fund. Dhe Laçi në pozita aspak të favorshme në kampionat, do luftojë për marrjen e sa më shumë pikëve të mundshme deri në vërshëllimën e fundit të kampionatit.(www.shkodrasport.com)
