Trajneri i Spanjës, Luis Enrike, ka komentuar shortin e hedhur në Doha, që e ka vendosur skuadrën e tij përballë Gjermanisë, Japonisë, teksa rivalin e fundit do ta mësojë në qershor e që pritet të jetë një ndërmjet Kosta Rikës dhe Zelandës së Re. Por sigurisht që e gjithë vëmendja ka qenë te përballja titanike me Gjermaninë.
“Gjëja më e rëndësishme është që ndodhemi në Katar. Pastaj dihet se çdo ndeshje do të jetë e vështirë. Për më shumë ajo kundër Gjermanisë. Ata janë një skuadër e madhe, nuk besoj se ka nevojë ta them unë një gjë të tillë.
Por pavarësisht kësaj, ne jemi Spanja, jemi kualifikuar me meritë këtu dhe nuk do të ndryshojmë asgjë nga loja jonë. Gjermaninë e njohim mjaft mirë.
E dinim se ndër skuadrat e vazos së dytë ishte rivali më i fortë. Na qëlloi ne dhe kaq. Ne do të jemi të përgatitur si gjithnjë”, ka thënë fillimisht trajneri i Spanjës. Duke analizuar më tej shortin, Luis Enrike ka nënvizuar se në një Kampionat Botëror gjithnjë ndeshja e parë është shumë e rëndësishme.
“Unë mendoj se ndeshja më e rëndësishme është ajo e para. Me një fitore ndryshon e gjithë ecuria e skuadrës, sepse në një Kampionat Botëror vetëbesimi është shumë i rëndësishëm.
Natyrisht që nuk mund të ankohemi për shortin, sepse në Botëror nuk ka short të lehtë”, ka thënë ai. Luis Enrike gjithashtu ka saktësuar për herë të parë se do të jetë një botëror ku skuadrat do të jenë të freskëta fizikisht. “Në ndryshim nga Botërorët e tjerë, ky luhet në dimër dhe lojtarët do të jenë të freskët, do të argëtohemi”, ka thënë ai.
