Fundi i sezonit ka bërë që Partizanin “ta lënë gjunjët”, shprehje kjo që ka lidhje me dëmtimet që kanë lojtarët.
Stafi teknik është përballur dje me një “lumë” dëmtimesh, ndaj për të mbushur boshllëqet e lënë nga titullarët, ishin thirrur disa lojtarë të ekipit B dhe nga të rinjtë.
Portieri Alban Hoxha mungoi ndaj Flamurtarit për një problem të vjetër në gju dhe ai nuk do të jetë në fushë edhe ndaj Kamzës.
Portieri u paraqit dje në terrenin stërvitor, por më pas u largua, pasi është vendosur që lojtari të rri pushim dhe të mos rrezikojë.
Gjithsesi, Hoxha pritet të jetë i gatshëm për grumbullimin me kuqezinjtë e trajnerit Kristian Panuçi. Lukas Kardozo e ka mbyllur me kohë sezonin.
Labinot Ibrahimi ishte dje pranë ekipit, por nuk u stërvit dhe do të mungojë ndaj Kamzës, pasi në Vlorë ka marrë një plagë në vetullën e majtë, ndaj e ka mbyllur sezonin.
Milan Kulum nuk është ndier mirë dje, pasi po kalon një virozë dhe ishte pushim, por pritet të rikthehet sot. Kapiteni Batha bëri një stërvitje të diferencuar dhe të shkurtër, pasi kishte probleme me gjurin.
Edhe Çani kishte të njëjtin shqetësim dhe nuk u përgatit me grupin. I diferencuar u përgatit dje edhe Emran Ramadani. Ndërsa, Mala dhe Telushi u përgatiten pa problem me grupin, por vlonjati mungon ndaj Kamzës se është i pezulluar nga kartonët.
