Flamurtari po kërkonte një trajner dhe më në fund administratori Sinan Idrizi ka vendosur se kush do ta drejtojë ekipin sezonin e ardhshëm.
Zgjidhja ka ardhur brenda familjes, teksa i është besuar Ardi Beharit drejtimi i ekipit.
Edhe në momentin e largimit të Shpëtim Duros iu besua pikërisht Beharit, që tanimë do të ketë mundësinë ta ndërtojë vetë ekipin e për sezonin e ri.
Lojtarët që ishin vjet i njeh mirë dhe klubi ka nisur nga puna, duke realizuar edhe rinovimet e para.
Emiljano Musta dhe Muhamet Useini ishin dy futbollistët e parë që nënshkruan kontrata e reja edhe për sezonin e ri futbollistik, ndërkohë që i pasoi edhe Tomislav Busic.
Danilo Alvesh është lojtari tjetër që pritet të zyrtarizohet sërish pjesë e skuadrës.
Marrëveshja është arritur, por për momentin sulmuesi ndodhet në Brazili, ku po rikuperohet për sezonin e ri.
Në planet e kuqezinjve është mbrojtësi i djathtë Goran Siljanovski. Ky i fundit ka disa oferta dhe ende nuk ka vendosur nëse do të mbetet pjesë e Flamurtarit edhe për sezonin e ardhshëm futbollistik.
DËSHIRA DAJA – Janë lakuar shumë emra gjatë kësaj periudhe për të nëshkruar me Flamurtarin, por në fund iu besua Beharit.
Mladen Milinkovic, Hasan Lika, Skënder Gega dhe Ilir Daja ishin emrat që u përfolën për të marrë drejtimin e kuqezinjve.
Trajneri i Skënderbeut ishte dëshira më e madhe, por nuk mund të pritej pafundësisht. E ardhmja e Dajës varet nga vendimi që do të marrë CAS pas dënimit që UEFA i ka dhënë korçarëve. /EDS/
