Futbollisti shqiptar i momentit mund të quhet padyshim Elseid Hysaj. Mbrojtësi i Napolit cilësohet si një nga futbollistët më të mirë në krahun e tij për kampionatin italian. Vetëm pak ditë më parë, “CIES”, e ka vlerësuar shkodranin si një futbollist i cili kushton 70 milionë euro. Kjo padyshim e kthen Hysajn në futbollistin më të kushtueshëm në histori, sa i përket futbollistëve shqiptarë.
Por në një intervistë për “Il Roma”, Hysaj shprehet se do të qendrojë tek Napoli deri në fundin e karrierës. “A do të qëndrojë “përjetësisht” tek Napoli? Po e kam menduar këtë gjë, në një vend të tillë. Jemi duke bërë mirë dhe ky është një ambjent fantastik. Sa i përket klauzolës time prej 50 milionë eurosh, është një shifër paksa e lartë por këtë nuk e vendos unë.
Ajo që duhet thënë është se futbolli po shkon në këtë rrugë. Për momentin duhet të shoh veten në fushën e lojës më pas do të shohim se çfarë do të ndodhë. Ndërsa për kampionatin dhe rivalitetin me Juventusin, tashmë jemi ne të parët.
Duhet të mendojmë vetëm për vetveten duke fituar të gjitha takimet dhe kështu mund të fitojmë duelin ndaj Juventusit për Skudeto”, u shpreh Hysaj. /vipsport/
