Trajneri i Brazilit, Tite, ka konfirmuar se mbrojtësi i krahut të majtë, Marselo, nuk do të jetë në fushë sot ndaj Meksikës, pasi nuk është rikuperuar në kohë për këtë sfidë.
Vendin e tij do të zërë Filipe Luis, ndërkohë që pjesë tjetër e formacionit do të përbëhet nga të njëjtët lojtarë që luajtën ndaj Serbisë. Fagner do të jetë sërish titullar në të djathtë të mbrojtjes.
Marselo u dëmtua në fillim të ndeshjes me Serbinë dhe u zëvendësua. Ai ndjeu dhimbje në shpinë dhe u tha se shkaku i këtij problemi mund të ketë qenë edhe dysheku i keq në hotelin, ku flenë lojtarët e Brazilit.
Mbrojtësi i majtë mund të kthehet në ndeshjen çerekfinale, nëse Brazili kualifikohet sot ndaj Meksikës.
