Kur kanë mbetur edhe dy takime nga fundi i kampionatit shqiptar, janë duke marrë zgjidhje shumë dilema të këtij sezoni.
Kështu, sa i përket çështjes më të ndezur, asaj të mbijetesës, Vllaznia është vetëm një hap larg rënies nga Superiorja.
Kjo situatë e vështirë e klubit shkodran, është komentuar edhe nga ana e mbrojtësit të Kamzës, Hektor Idrizaj.
Ai shprehet se Vllaznia nuk duhet ta përjetojë si fundin e botës këtë rënie, pasi në sezonin e shkuar e provoi edhe Tirana.
“Me Flamurtarin në fitoren e fundit kemi bërë një ndeshje të mirë, teksa tensioni ishte në këmbët tona dhe ajo ndihej lehtësisht.
Tashmë luajmë ndaj një ekipi të vështirë si Laçi. Por përderisa matematika na e lejon, atëherë ne do e provojmë marrjen e një tjetër 3-pikshi, për të siguruar mbijetesën.
Kemi punuar shumë taktikisht me Ahmatajn, sidomos duke analizuar me detaje kundërshtarët direkt.
Ne kemi marrë dy rezultate shumë të mira me kundërshtarët direkt në transfertë. Çdo futbollist që ka vite që luan, e di peshën e fanellës së Vllaznisë.
Megjithatë ky është futbolli dhe dinamika e tij është e tillë, ku duhet të japësh gjithmonë maksimumin, pasi e sheh veten edhe në një pozitë të tillë si Vllaznia.
Sigurisht që ka keqardhje për këtë situatë, por nuk është fundi i botës, pasi vjet ra edhe Tirana. Në futboll mund të ndodh çdo gjë”, është shprehur Idrizaj për “RTSH Sport”. /vipsport/
