E planifikuar për t’u zhvilluar gjatë muajit të kaluar, kupa me emrin e legjendës së çiklizmit shqiptar- Agim Tafili, do të zhvillohet pikërisht në muajin maj. Më konkretisht, në datat 18-19 të këtij muaji. Federata Shqiptare e Çiklizmit jo më kot ka zgjedhur këto data për ta zhvilluar këtë aktivitet që përkojnë me ditëlindjen e këtij mjeshtri të madh, të ndarë nga jeta pak kohë më parë. Pikërisht më 19 maj, Agim Tafili do festonte 52 vjetorin e lindjes dhe pikërisht për këtë arsye, kolegët, miqtë, drejtuesit e Federatës kanë dashur t’ia festojnë këtë përvjetor të lindjes me një kupë me emrin e tij. Ajo do jetë e përbërë nga dy etapa. Më 18 maj, do jetë etapa e parë Tiranë- Shkodër, ndërsa një ditë më pas etapa e dytë, ajo Shkodër- Pukë- Shkodër. Në kupën “Agim Tafili” do marrin pjesë çiklistët më të mirë të vendit të cilët do nderojnë këtë kampion të madh. Por ajo që të bën përshtypje është se Bashkia Shkodër ende nuk e ka kaluar për miratim në Këshillin Bashkiak miratimin e dhënies së një titulli të lartë për këtë kollos të sportit shkodran dhe atij shqiptar. Klubi shumësportësh Vllaznia ka dërguar prej më tepër se dy muajsh kërkesën për dhënien e një titulli kësaj figure të madhe, kërkesë që ka mbetur mesa duket në sekretarinë e Këshillit. Ideja ka qenë që me rastin e zhvillimit të kësaj kupe, Shkodra ta nderonte djalin e saj edhe me një titull të lartë (pas vdekjes). Por kupa do zhvillohet dhe për fat të keq, shkodranët sërish kujtohen me vonesë.www.shkodrasport.com
