Edicioni 2017-2018 i Kategorisë Superiore thuajse e ka zgjidhur çështjen e titullit.
Pavarësisht humbjes ndaj Kukësit, Skënderbeu e ka të siguruar triumfin falë distancës prej 11 pikësh ndaj kuksianëve, ndërkohë ka dilema për çështjen Europë, por më kryesorja, duhet zgjidhur lufta për mbijetesë.
Sezonin e shkuar Vllaznia e siguroi qëndrimin në javën e fundit, pas barazimit me Tiranën, rezultat që dërgoi bardheblutë në Kategorinë e Parë.
Shkodranët e mbyllën me 40 pikë, po ashtu si Flamurtari, Teuta e Laçi, pra kuota 40 rezultoi e mjaftueshme për të qëndruar mes më të mirëve, ndërkohë këtë edicion situata duket se ka ndryshuar.
Teuta, Vllaznia dhe Kamza, të cilat janë në garë për të mbijetuar kanë respektivisht 34, 36 dhe 38 pikë, kur kanë mbetur edhe 5 ndeshje nga mbyllja.
Kuota 40 nuk është aspak larg për të trija skuadrat në fjalë, por në ndryshim nga sezoni i shkuar, kjo kuotë nuk do të mjaftojë për të vijuar aventurën në Superiore.
Duke llogaritur që janë edhe 15 pikë në lojë, gjasat janë që për të siguruar mbijetesën duhen të paktën 44 pikë, natyrisht kjo është një përllogaritje në parim,
pasi gjithçka varet nga rezultatet që do të marrin të trija ekipet në javë pas jave, megjithatë është thuajse e sigurt që 40 pikët nuk të shpëtojnë më, çka dëshmon se lufta për mbijetesë do të jetë mjaft e ashpër deri në javën e fundit të Kategorisë Superiore.
