Dritan Mehmeti ka përmbysur situatën te Dinamo. Para ardhjes së tij, ‘Blutë’ ishin me plot gojë ekipi më i dobët në Superiore, këtë e tregoi fusha e lojës teksa ekipi gjendej i fundit në renditje. Mehmeti ishte trajner i skuadrës në sezonin e fundit, por në verë u spostua tek moshat pas ndryshimeve radikale në klub.
Në krye të Dinamos u emërua një emër i njohur si Di Biagio, megjithatë, i zoti ia di vetë ‘telat’ shtëpisë. Me italianin skuadra çedoi dhe u deshën plot 9 javë që drejtuesit të rikthenin në pankinë Mehmetin.
Që prej javës së 10-të kur Mehmeti ‘debutoi’ në barazimin me Tiranën, Dinamo nuk njeh humbje. Është kthyer në një ekip të pathyeshëm duke regjistruar 3 fitore e 3 barazime me një golavarazh pozitiv 6:2.
Nëse bëjmë një vështrim të renditjes së tabelës që nga ndeshja e parë e Mehmetit, Dinamo është me plot gojë për titull. 12 pikë të marra, aq sa edhe Partizani dhe vetëm 2 më pak se Egnatia e bëjnë ‘Nëndetësen’ një ekip që nuk njihet në krahasim me atë ç’ka pamë në fillim.
Sfida e rradhës për Dinamon është ndaj Vllaznisë dhe Mehmeti ka një tjetër ‘test’ për të kaluar. Nëse ia del me sukses mund të konfirmojë pozitën e tyre në ‘Final Four’.
