Portieri i talentuar i Vllaznisë, Alen Sherri, pritet që në janar të transferohet në një nga klubet e Serisë A. Lajmin e japin mediat italiane, të cilat parashikojnë se portieri i talentuar shqiptar do të lërë gjurmë në kampionatin italian në të ardhmen dhe se klubi i Romës do të pendohet që nuk firmosi me të kur e mori në provë vitin e kaluar.
Sipas “Calciomercato.it”, menaxheri italian i Sherrit, po shqyrton disa oferta të ndryshme që i kanë mbërritur në kohët e fundit për lojtarin, i cili në fakt nuk është titullar fiks te Vllaznia, por alternohet me Selimajn.
Portali në fjalë parashikon një transferim të tij në janar, edhe pse jo në radhët e Romës ku Valter Sabatini i kishte siguruar atij një provë dhe kishte mbetur i kënaqur nga paraqitjet e futbollistit. Fakti që Roma vendosi të mos bënte asnjëherë një hap konkret për të siguruar lojtarin, u mundëson skuadrave të tjera të synojnë të afrojnë portierin premtues shkodran.
