Nëse Vllaznia deri më tani nuk ka shfaqur ndonjë lojë të bukur por është kënaqur me pikët e marra, sigurisht që kjo është një teori shumë positive për momentin e trajnerit Shpëtim Duro. Por ajo që duhet të shqetësojë është sesa kohë do vazhdojë kjo ecuri positive duke luajtur në këtë mënyrë. Ai që ka folur këtë rradhë është një specialist I njohur futbolli, pikërisht Agim Medja. Duke folur në lidhje me ndeshjen e fundit, atë të humbur në Durrës ndaj Teutës, ai do të shprehej: “Nëse marrim në analizë humbjen e fundit në Durrës, ajo që duhet të shqetësojë stafin drejtues është paraqitja në fushën e lojës dhe mungesa e qëndrueshmërisë dhe mënyra e interpretimit të lojës gjatë 90 minutave.
Gjatë këtyre javëve janë marrë pikë dhe kjo ka krijuar një atmosferë optimiste. Por ndalesa e serisë së rezultateve positive në Durrës mendoj se duhet analizuar me hollësi seps kjo është baza e ecurisë për të ardhmen. Gjatë këtyre javëve ka patur kritika të ndryshme për lojën jo të bukur që ka zhvilluar skuadra por këto kritika janë zbehur nga rezultatet. Po marr në analizë vetëm dy ndeshjet e fundit, atë me Shkumbinin në Shkodër dhe këtë me Teutën. Në ndeshjen ndaj peqinasve, Vllaznia në 25 minutat e fundit ndonëse ishte në avantazh, u tërhoq mbrapa duke I dhënë terren kundërshtarit. Trajneri Duro e ka deklaruar se është pragmatist dhe atij I intereson rezultati por sa garanci ka në arritjen e tij kur luhet në mbrojtje”. Një Vllaznia e kujdesshme, një trajner pragmatic, janë fjalë këto që po dëgjohen shpesh këto kohët e fundit. Specialisti Medja mendon se ka patur jo pak gabime të skuadrës në këto ndeshje të këtij kampionati prandaj dhe duhet bërë shumë kujdes. “Vllaznia s’duhet të luajë me idenë që të marrë barazime ngaqë në sulm po shfaq probleme. Kjo sepse duke vazhduar në këtë mënyrë rrezikon jo pak. Të mos harrojmë se nga vendi I dytë deri tek I dhjeti, I ndan vetëm tre pikë dhe një apo dy rezultate negative, e zbresin poshtë atë. Nëse skuadra luan me një mbrojtje të ngjeshur, me katër mbrojtës të mirëfilltë, shto edhe dy mesfushorë me detyra mbrojtëse, plus edhe portierin, bëhen shtatë lojtarë që kujdesen për të mos pësuar gol. Në fakt edhe këtu ajo ka treguar se ka gabuar në jo pak raste. Përpos kësaj, ka bërë edhe shumë pak në lojën sulmuese. Dy sulmuesit janë larg formës së tyre, prandaj dhe ndihet mungesa e Dragoit në këto takimet e fundit. Sa I takon zëvendësimeve të trajnerit në ndeshjet e fundit, mendoj se trajneri Duro ka dashur të mbrojë rezultatin dhe kjo praktikë është e pranueshme në momente të veçanta kur ai e sheh se diçka nuk shkon ashtu siç duhet. Vllaznia në asnjë moment nuk ka arritur të përmbysë rezultat e po ashtu ka patur raste që kanë qenë kundërshtarët të cilët ia kanë përmbysur atë. Kjo tregon paqëndrueshmëri në lojën e saj”- thotë më tej ai. Megjithatë Agim Medja ka besim se stafi drejtues, duke u munduar t’I riparojë gabimet e vërejtura deri tani tek skuadra, do arrijë jo vetëm të kalojë Shkumbinin për kupë, por edhe Tiranën në fundjavë për kampionat. “E konsideroj një ndeshje plotësisht të kalueshme atë me Shkumbinin. Sigurisht që duhet bërë kujdes por mes dy ekipeve ka diferenca në objektiva dhe kualitete të lojtarëve. Kur të kalojë kjo ndeshje pastaj do ketë një përqendrim të madh tek sfida me Tiranën të cilën duhet ta kalojë me sukses edhe atë për të patur një vazhdimësi positive në kampionat. Skuadra I ka mundësitë dhe aftësitë për ta bërë këtë gjë. Duke korigjuar edhe disa nga të metat që I përmenda më lart, jam I bindur se Vllaznia do jetë në mes skuadrave më të mirë në fund të kampionatit”- ka thënë në fund specialisti Medja.
Gjergj KOLA
