“Vllaznia B” i ka bërë një nisje përgjithësisht të mirë kampionatit të sivjetëm të kategorisë së dytë. Ka barazuar në takimin e parë me Partizanin B ndërsa ditën e djeshme ka fituar ndaj Sopotit.
Ekipi shkodran në këto dy takime është drejtuar nga zëvendëstrajneri Admir Mehja ngaqë trajneri i parë Ervis Kraja siç dihet ka patur një fatkeqësi familjare dhe ka munguar në to.
Duke folur në lidhje me fitoren e djeshme ndaj librazhdasve, Mehja do të shprehej: “Ndeshja ndaj Sopotit u karakterizua nga një lojë shumë e fortë ndaj një kundërshtari direkt.
Pretendimet tona në këtë sezon janë ngjitja në kategorinë e parë dhe besoj se jemi në rrugën e duhur për këtë gjë. Ndeshjen e ardhshme e kemi në Kukës ku padyshim do të tentojmë sërish suksesin”.
Medja ndërkohë në prononcimin e tij për “Shkodra Sport” është ndalur edhe tek ndeshja e sezonit të kaluar
“Vllaznia B”- Tërbuni për të cilën është diskutuar shumë tre ditët e fundit dhe për të cilën është ndalur nga policia trajneri i kombëtares shqiptare të femrave Armir Grima.
Duke folur në lidhje me këtë takim, ai shprehet: “Jemi çuditur të gjithë nga ajo që është thënë në lidhje me këtë ndeshje. Ka qenë një takim shumë i fortë dhe i luftuar shumë fort deri në sekondat e fundit.
Të dy ekipet e kishin imediate fitoren dhe kjo u reflektua edhe në fushë me një luftë ndoshta edhe të ashpër në momente të caktuara, aq sa ka patur edhe futbollistë që kanë shkuar në spital të lënduar.
Të gjithë janë të vetëdijshëm se atë ndeshje e kemi fituar me meritë dhe këtë e ka pranuar edhe kundërshtari. Prandaj të tilla paragjykime për trukim të kësaj ndeshje janë absurde”.
© shkodrasport.com
