Gjendja e ekipit të dytë të klubit shkodran nuk është e mirë për momentin. Edhe ndeshja e parë e këtij viti, ajo ndaj Korabit, nuk u kurorëzua me sukses nga ana e tij duke marrë vetëm barazim 0-0. Megjithatë zëvendëstrajneri i “Vllaznisë B” Admir Mehja, ka besimin se situata do të mundë të ndryshojë shpejt.
Madje, duke nisur nga ndeshja e rradhës ndaj Dinamos. “Në pamje të parë duket një synim i pamundur marrja e fitores ngaqë Dinamo na ka mundur edhe në Shkodër por nëse e rikujtojmë atë takim, jemi mundur me një gol të pësuar në momentet tona më të mira kur po insistonim të shënonim.
Tani do të kërkojmë të marrim revansh duke fituar në Tiranë. Kemi patur disa probleme me largimin apo dëmtimin e lojtarëve por jemi munduar të konfigurojmë ekipin me marrjen e lojtarëve të tillë si Borshi, Dyca e Hotaj.
Po ashtu, shpresojmë që edhe lojtarët e ekipit të parë të na bashkohen për këtë ndeshje sepse në rradhë të parë kjo u shërben vetë atyre për të ruajtur formën dhe pastaj edhe ekipit tonë”- ka thënë Mehja.
© shkodrasport.com
