Situata e Elseid Hysajt në këto moment duket e paqartë. Aktualisht për mbrojtësin e përfaqësueses shqiptare qarkullojnë variante nga më të ndryshmet për vazhdimin e karrierës së tij, duke filluar nga rinovimi i kontratës për të vazhduar me transferimin në janar te Çelsi apo Atletiko Madrid.
Por Fulvio Marruko, menaxheri i Xhianfranko Zolës, aktualisht ndihmës i trajnerit Sarri te Çelsi, tregon se klubi anglez nuk ka plane të bëjë lëvizje të mëdha gjatë janarit.
“Hysaj në Londër? Nuk mendoj se Çelsi do të bëjë lëvizje të mëdha në janar. Ndoshta është Napoli ai që po shtyn që të realizohet ky lloj transferimi”, theksoi menaxheri duke bërë të qartë se klubi italian dëshiron të largojë mbrojtësin kuqezi.
Gjithsesi, ekziston një tjetër hipotezë që po merr gjithnjë e më shumë jetë. Çelsi do të firmosë që tani akordin për transferimin e futbollistit, por ndërkohë do ta lërë huazim deri në fund të sezonit te napolitanët, një zgjidhje e përkohshme e një situatë që nga dita në ditë bëhet edhe më e komplikuar./vipsport/
