Klubet e Premier Ligës pavarësisht krizës që ka shkaktuar pandemia e Koronavirusit e kaluan përsëri barrierën e 1 miliard paundëve shpenzime në merkaton e verës. Pa të ardhurat e zakonshme nga biletat e tifozëve dhe shitjet, klubet i shtrënguan disi shpenzimet e tyre.
Por në Angli, Arsenali dhe Mançester Junajtid bënë merkaton më aktive gjatë ditës së fundit, duke transferuar Tomas Partejn, Tejesin, Kavanin, Dialonë dhe dy talente Pejistri dhe Kambvala. Totali i 1.25 miliardë paundëve shpenzime bruto për të 20-ta klubet e elitës në Angli e klasifikon këtë verë si të tretën më të shtrenjtë në historinë e Premier Ligës.
Shpenzimi neto i klubeve është 813 milionë paund. Kjo e fundit është rritur me 180 milionë paund nga vera e shkuar. Çelsi është klubi që bëri shpenzimet më të mëdha të merkatos jo vetëm në Angli, por në të gjithë botën, duke nxjerrë nga banka për shtatë lojtarë Haverc, Verner, Çiluell, Zijeh, Mendi, Tiago Silva dhe Sarr shifrën e 226 milionë paundëve.
Në vend të dytë renditet Mançester Siti me 147 milionë dhe podin e plotëson Aston Vila (85 milionë). Liverpuli dhe Arsenali, respektivisht vendi i 6-të dhe i 7-të, kanë shpenzuar gati njësoj: 81.7 milionë paund “Reds”-at për Zhota, Tiago Alkantara,
Tsimikas dhe 81.5 milionë paund “Topçinjtë” që afruan Magalhaesh, Runarson, Pablo Mari, Uillian, Soares, Sebajos dhe Partej. Pesë afrimet e kryesueseve të Premier Ligës, Evertonit të Ançelotit, i kushtuan skuadrës blu të Mersejsajdit 65 milionë euro.
Junajtid renditet në vend të 10-të, me 54.4 milionë paund shpenzime për të transferuar emra si Van de Bek, Kavani, Tejes, dhe Dialo. Komshinjtë e tyre të Sitit transferuan Diaz, Ake, Ferran Torres, Moreno, Kouto dhe Kabore.
Bërnlej është klubi i vetëm që nuk ka bërë asnjë blerje. “Shpenzimet e transferimeve janë thuajse përgjysmuar këtë verë krahasuar me totalin e shpenzimeve në pesë kampionatet kryesore të Europës”, tha për agjencinë “Associated Press”, ekonomisti Sem Mailej, i Qendrës së Kërkimit për Ekonomi dhe Biznes: “Premier Liga e ka ruajtur disi standardin, por sigurisht krahasuar me Gjermaninë dhe Spanjën, ku tregu i tyre është penguar nga Koronavirusi”.
