Mesfushori i Teutës, Fabjan Beqja, në intervistën e dhënë për “Panorama Sport” thotë se çdo rezultat tjetër, përveç fitores, do të ishte dështim për durrsakët, teksa kërkon mbështetjen e tifozëve për ta thyer Vllazninë.
“Është një ndeshje shumë e rëndësishme për vetë pozicionin që kemi në klasifikim. Po e studiojmë me detaje kundërshtarin me synimin për të marrë maksimumin.
Kjo ndeshje vlen 6 pikë për ne, pasi dihet që përballë kemi një kundërshtar direkt. E respektojmë Vllazninë, por futemi në fushë me qëllimin e vetëm për të fituar”, tha fillimisht durrsaku, i cili iu përgjigj më tej pyetjeve.
Sa vendimtare është ndeshja me Vllazninë për mbijetesën?
Ne e shohim si një finale këtë takim, por të jem i sinqertë, deri në fund të kampionatit, çdo ndeshje e kemi të tillë, pasi duhet të sigurojmë sa më parë mbijetesën.
Faza e katërt sapo ka filluar dhe nuk mund të themi që ky takim do të jetë vendimtar, por sigurisht një fitore kundër tyre do të ishte një hap i madh drejt mbijetesës.
A ka presion në ekip, duke pasur parasysh faktin që skuadra rrezikon shumë dhe për më tepër edhe tifozët e kanë braktisur?
Këtu është një ambient shumë komod për çdo futbollist apo trajner. Të gjithë impenjohen maksimalisht dhe mundohen të japin më të mirën.
Nuk kemi presion, pasi besojmë te forca jonë dhe e dimë se nëse luajmë si në ndeshjet e fundit, do të jemi në Superiore edicionin e ardhshëm.
Tifozët janë lojtari jonë i 12-të dhe kemi shumë nevojë për ta, e dimë që kemi gabuar dhe ata kanë të drejtë. Ndeshja me Vllazninë është shumë e rëndësishme dhe ata duhet të vijnë të na mbështesin, pasi kemi shumë nevojë.
Gara për mbijetesë sa vjen dhe ndërlikohet, ju favorizon fakti që kundër Vllaznisë dhe Kamzës luani në shtëpi?
Në fakt, ne kemi marrë rezultate më të mira kur kemi luajtur në transfertë. Megjithatë, kur luan në shtëpi, është një ndjesi tjetër sepse nuk ke presion dhe tifozët janë një shtysë më tepër.
Në këto dy ndeshje duhet ta shfrytëzojmë patjetër faktorin fushë për të marrë 6 pikë.
A i druheni gjykimit, pasi Vllaznia ka kërkuar arbitra të huaj?
Kjo nuk është një pyetje që më takon mua. Ne duhet të punojmë fort në stërvitje dhe të japim maksimumin në fushë.
Vllaznia ka të drejtën e saj, por për ne pak rëndësi ka kush do të jetë arbitri, pasi ne jemi të bindur për forcën tonë dhe e dimë se po të luajmë me këtë ritëm fitojmë ndaj çdo kundërshtari në Superiore.
