Lionel Messi duket se i ka kërkuar Cristiano Ronaldo-s që t’i bashkohet në MLS. Dy legjendat nuk kanë luajtur kurrë në të njëjtin klub. Ronaldo, 39 vjeç, u transferua tek Al Nassr në Arabinë Saudite në dhjetorin e vitit 2022, ndërsa Messi shkoi në Florida verën e kaluar, të dy në transferime me kosto zero.
Të dy, ashtu siç pritej, po shkëlqejnë në aventurat e tyre të para jashtë Europës. Pasi kanë qenë rivalë për pothuajse dy dekada, veçanërisht gjatë periudhës që të dy luanin në La Liga mes 2009-ës dhe 2018-ës, tani mund t’i shohim të dy bashkë në të njëjtën skuadër.
Gazetari saudit Abdulaziz Al-Tamini ka bërë të ditur se Inter Miami ka kontaktuar Ronaldo-n për ta pyetur në lidhje me mundësinë që portugezi të transferohet tek ata në 2025-ën.
Ronaldo do të jetë 40 vjeç në atë kohë, por duke parë formën e tij aktuale, pesë herë fituesi i Topit të Artë nuk ka ndërmend të tërhiqet nga futbolli i luajtur.
Pavarësisht nga kjo, Ronaldo ose përfaqësuesit e tij nuk kanë bërë asnjë koment në lidhje me të ardhmen e CR7. Gjithashtu, nuk dihet nëse portugezi ka dëshirë të luajë me Messi-n në MLS./telesport/
