Luis Van Gal e ka cilësuar si “të mërzitshëm” futbollin që aplikon Zhoze Murinjo te Mançester Junajtid. Sipas trajnerit, i cili u shkarkua nga drejtimi i “djajve të kuq” në vitin 2016, stili i tij ishte më tërheqës për publikun. “Ne luanim futbolli që ishte i mirë”, tha Van Gal për “FOX Sports” në Holandë. “Por ky është një model futbolli që nuk vlerësohet në Angli. Tani, duke parë Manccester Junajtid, unë arrij në konkluzionin se Murinjo nuk po kritikohet edhe pse është futboll shumë më i mërzitshëm.
Ajo që Mançester Junajtid po prodhon tani është futboll mbrojtës. Unë luaja gjithmonë futboll sulmues. Prova është se kundërshtarët ishin ata që parkonin gjithmonë autobusin. Ata nuk e bëjnë një gjë të tillë tani pasi Murinjo luan shumë mbrojtës”, tha Van Gal. Holandezi ka qenë “mësuesi” i Murinjos në periudhën kur drejtonte Barcelonën, pasi aty e kishte portugezin si ndihmës të tijin për 2 sezone, para se ai të largohej drejt Portugalisë për të filluar karrierën si trajner.
